k.w.k الجمعة أغسطس 22, 2008 5:08 pmوراح عنهم بطي وتمت ام سيف في الصاله اتحاتي ..
ناصر : امايه خلاص لا تحاتين انا بسير ادوره وين يعني شو بيسوي بعمره تلقينه بس يبا يقعد بروحه وعقب بيرد ..
ام سيف : الله يهديه .. ياله ياربي انك اتهديه ..
وظهر ناصر عن امه وشغل سيارته يدور .. سيارة خالد .. وماحصلها وبعدين حصلها واقفه ع طرف الشارع صوب العرقوب وهو قاعد فيها وموخي حاط راسه ع السكان .. نزل من سيارته ويا ركب حذاله ..
ناصر : خالد شو ياك ..؟؟؟
وخالد تم منزل راسه ع السكان وماطاع يرفعه ..
ناصر : لا تم جذيه خبرني شو ياك شو يعني لو ماتباك .. مافيها شي هيه بنت وغيرها الف بنت .. انا حالي كان من حالك بس نحن نستاهل انا كانت في خاطريه يزوي وكنت اباها ونفس اليوم اللي برمس فيه امايه رمستني انها بتملج وانخطبت .. ماخربت عليها ولا سويت اللي سويته .. كل شي في هالدنيا نصيب بتيلس اتصيح النصيب ولا بتعترض عليه ...؟؟
خالد : بس نحنا غير غييييييييير ؟
ناصر : شو اللي غير ليش شو بينك وبينها ..
خالد: مابيني وبينها شي ماشي خلاص انته ليش لحقتني انا كنت اريد اقعد بروحي .. ارجوك ناصر .. دخييييييييييييل الله .. دخيييييييييييييل الله انك اتخليني ابروحي .. روح وبردلكم عقب دخيل الله ..
ناصر : ماعليه خلاص بخليك بروحك ... ونزل عنه ناصر . وتم خالد بروحه ..
ليش جذيه هيه تبا اتسويه فيه انا في شو غلط عليها ليش عقب ماتمنيتها ردتني ورفضتني .. معقوله هيه ماكانت اتحبني .. وانا فهمت عمري السالفه غلط .. لا انا جذي عايش ومش عايش .. ياربي ليش هيه جذي انا لازم افهم انا بالضبط في شوه عيشت عمري ...!! ووين بالضبط انا طحت .. وعند اي مكان ليش الحينه بالذات عقب مادخلتها في بالي مابغتني .. ليش ..!!؟؟!..لا انا لازم افهم .. وشل تلفونه وتم ايطالع الارقام .. وهو اصلا من قبل كم يوم كان شال رقم حصه من تلفون امه .. ومخزننه في تلفونه (( غلا الدنيا )) .. واتصل وفي هالوقت بالذات ماكان مهتم في اي شي الا انه يفهم ... هو شو كان .. وحياته شو كانت بالضبط وليش معاها هيه بالذات اللي صدق حس بالحب وحس انه عاش الحب الصدقي في حبها وهواها .. تم يرن ين التلفون .. وعقب ردت ..وكانت اصلا حصه تعبانه وكانت في نفس لوقت اتصيح لانها ردته ..وشو ممكن ايصير عقب ماردته كيف بطالع في عين امها وابوها .. كيف ..وتم خالد يتصل مره مرتين ثلاث محد ايرد جرب رابع مره وردت وتمت ساكته ..
خالد: الوو ..حصه دقايق دخيلج ..
حصه منصدمه : منووه ..؟؟
خالد: انا خالد دخييييييييييلج دقيقه بس ابا افهم ومن حقي اعرف انا وين عقيت عمري ..
حصه : خالد من ويبت رقميه ...وشو وين عقيت عمرك انته عن شو ترمس ؟؟
خالد: يبته من وين مايبته .. عقيت عمريه في هواج وحبج وعشقج واخر شي بكل سهوله وبكل برود قلتي ماباك ليش حصووه ليش .. شو ذنبي ..
حصه منصدمه واتحس بقلبها يتقطع : وانا .. بعد .. شو ذنبي .؟؟
خالد: ليش صديتيني ليش مابغيتيني .. انتي شو سالفتج انتي حبيتيني ولا انا عيشت عمري هالشي وصدقته ..؟؟ وللي خلالج هلج اتجاوبين دخيلج انا ضايع ومش عارف انا شو .. ع الاقل فهميني عسب اعرف ان وين مكاني او انا شوه مشكلتيه وارضى ابها وارضى بلي الله كتبه اليه بس انا جذي عايش وهب عايش هب عارف حياتي كيف .. دخيييييييل الله ياحصصوه دخيييل الله فهميييييييييني .. انتي حبيبتيني .. .؟؟؟ وليش رفضتيييييني .؟؟..
حصه فلحظة ضعف واحساس بهزيمه وخوف من شي مش موجود : كنت كنت ياخالد كنت بالنسبه اليه الهوى والماي عمري كله ضاع بسبة حبك .. ثمان سنين من حياتي مااشوف ولا ااسمع ولااعترف بوجود اي شي في دنيايه غير حبك اللي شليته ابرووووووحي ومحد يدريبي ولا حد عاشه معايه عشت الحب فيييك وبدووووووونك .. وانا احبك .. وانته في بالي .. لكن عقب ماتحس واتعرف اني اباك بكل برود واستهزاء بمشاعريه بكل صبري اللي صبرته تستهزء ابيه واتروح لوحده غيري وتهواها واتعق حبي ورا ظهرك .. وتخطبها ويوم مابغتك وردت ييت ادور الحب اللي كان يباك ..؟ظنك انا شو بكون هييج الساعه وكيف تباني ارضى واعيش .. ؟؟ كيييييييييف ..؟؟ ترضاها عليه اذا انته مثل ماتقول صدق الحينه اتحبنيه ترضاها عليه ..؟؟..
خالد انصدم صدمة حياته طول عمره هو ماسمع عن هالشي ولا يعرفه ولاشي .. اول مره يسمع عن هالشي ويعرفه معقوله حصه وانا .. وكانت وانا مااعرف حس بغيمه سوده جدام اعيونه ..
خالد بصوت متقطع : انا ماكنت اعرف بهاذا كله انا ماتوقعت هالحب كله اتوقعته حب من نظره وحده حب ماتعدى اسبوع حتى .. مالي ذنب .. كيف اتحاسبيني بشي انا مااذنبت به .. ليش هالظلم ..؟؟
حصه وهي اتصيح : بس خالد ارجوك خلاص .. ماقدر مااقدر ارحمني .. وسكرت الخط وبندت تلفونها وتمت اتصيح من كل قلبها .. صياح بونات والام وجروح .. وحب جدام عينها ايضيع من ايدها وهيه السبب ..وتم خالد يفكر وميت من القهر قبل كان مقهور لانه مايعرف والحينه مااااااات من القهر لانه عرف اللي عرفه .. وشغل سيارته كان ايريد يروح بوظبي صوب البحر .. وكان يسوق بسرعه ... وهو مب حاس بعمره وعند الدوار لف لفه كبيره جلبته وتمت السياره تجلب به .. لين الرمله وع الرمله انخشت ريله في المكينه مالت السياره .. وشافوا الحادث الشباب واترابعوا له .. ويت سيارة الاسعاف وشلته بسرعه ونقوله المستشفى .. واتصلوا بهله بعد ماجافوا بطاقته ... ورد عليهم ابوه ..
الريال : السلام عليك ..
بو سيف : وعليك السلام ..
الريال : بو خالد ال....
بو سيف : هيه نعم امر ولديه ..
الريال : الوالد ولدك خالد مسوي حادث والحينه هو في مستشفى ال..... ..
بو سيف منصدم : خاااااااااااااااالد ؟؟.. يايين يايين الحينه ..
وسكر بو سيف وزقر على ناصر وبطي ...وام سيف ظهرت وراه ..
ام سيف : شو بلاااااااه .؟؟ خالد ؟؟
بو سيف : ايقول الريال مسوي حادث ..
ام سيف يالقعتييييييييييييييه ؟. يالقعتييييييييييه . ياويييييييييييييل قلبي عليك يالولديه .. ودنيه له ودنيييه له ..
ونشوا بو سيف وام سيف ولحقوهم ناصر وبطي وراشد وزايد كلهم ع المستشفى .. واول مادخلوا المستشفى قالولهم انه دخلوه العنايه وتمت ام سيف اتصيح على ولدها ..
بو سيف : ياموزه لاتسوين جذي هب زين عليج .. ياموزه ادعيله ..
راشد: امايه نشي بوديج البيت ومن نطمن عليه بطمنج نشي يامايه نشي ..
ام سيف وهي اتصيح : لالله انا هب متحركه من مكانيه الا يوم ايخبروني ولديه شو ياه ..
وخوانه كلهم هب مصدقين اللي استوا في اخوهم وراح راشد حق الريال .. اللي نقله المستشفى وقاله كيف صار الحادث وهو اصلا شو شاف .
راشد: يزاك الله ال خير ..
الريال : افا عليك .. بس الحينه نحن نبا نطمن عليه وعن حالته ..
راشد: الدكتور عنده والحينه نحن نتريا يظهر نبا انشوف شو حالته ..؟؟.
الريال : الله يقومه بالسلامه ياربي .
راشد: اميين يارب ..
وتموا نص ساعه يتريون الدكتور لين يظهر وظهر الدكتور وزقر ابوه وراح معاه راشد ...
الدكتور : الحمد لله يابويه يت الضربه سليمه لانه طاح ع التراب . فما ظرر وايد .. بس شي واحد .. والله يعينكم .. ريله خلاص مامنها فايده .. وماظن ان بيروم يمشي عليها لانه الانسجه ماعادت تنفع انها ترجع مره ثانيه مع بعض .. الله يصبركم .. بس الحمد لله لا كسور ولا رضوض بس شوية شموخ بسيطه .. بس ريله .. والله نحن حاولنا بس مابيدنا شي وكله بيد الله ..
راشد منصدم : شووووو دكتور يعني خالد مابيروم يمشي من ريله ..
دكتور : بيمشي بس بريل وعكاز ..وفي امكان انكم تسفرونه برع ويركبوله ريل صناعيه .. طبعا مش كلها بس من الركبه ..
راشد وهو يصييييح اخوه : مستحيييييييل شو اتقول هاذا خالد هاذا الصقرر .. جذي يستويبه يادكتور دخيل الله قول غير هالرمسه ..
دكتور : قول الحمد لله .. الله كاتبله مالكم اعتراض ..
وطول هالوقت ابو سيف ساكت وعيونه تتدمع على ولده اللي استوابه كل هذا بغمضة عين ..
بو سيف : خالد .. مابيلس دقيقه في هالبلاد.. اليوم يسافر ..
دكتور : ابويه يباله يرتاح ع الاقل يومين ..
بوسيف : ماعليه يوم وبتخلص اجراءاته اذا نش وعرف بلي صارله مابيرحم حد هاذا ولديه وانا اعرفه .. وامه شو اقولها ؟؟ وتم ياشر على المكان اللي كانت قاعده فيه ام سيف .. وامه .. شو اقولها .. شو اخبرها عن ولدها ..
راشد: خلاص ابويه انا الحينه بتصل في احمد وبشوفه ..
وراح راشد بعيد عنهم واتصل في احمد .. وراح بو سيف وخبرهم بالموضوع وتمت ام سيف اتصيح بحسره على ولدها واتصيح من خاطرها .. وعيالها يحاولون يهدونها وهم بروحهم منصدمين .. بس شو يقدرون يقولون غير لا حول ولاقوة الاه بالله .. الله يصبركم ..
شقة احمــــد
الجمعه 4العصر
لنـــــــدن ..
احمد كان توه واصل الشقه وراجع من الدوام تعبان .. شمه كانت منسدحه اطالع التلفزيون .. سلامي حاطيلها العاب وتلعب واتفرفر العابها في كل مكان ..
احمد: السلام عليكم ..
شمه بابتسامه : وعليك السلام والرحمه .. تو مانور ابيت ..
احمد: منور بوجودج يانور البيت .. وراح صوبها وباسها ع راسها .. وعقب سار صوب سلامي اللي ماسكه اللعبه ومعصبه .. شوو ؟؟ بلاج العيووز .؟.؟؟
سلامي : دادا .. دادا ..
احمد: هيه دادا شو بلاه ليش معصبه ..
شمه : معصبه ع اللعبه .. ليش ماتتحرك كيف دادا وماتتحرك ..
احمد: ههههههههههه .. اكووه دادا عند ماما ..
سلامي : ماما .. دادا ..
احمد : فديييييييت روحج ياربي وشلها وتم يلاعبها ..
ونشت شمه راحت اتحطله الغدا .. وبتتغدا معاه لانها دوم تترياه هالوقت ودوامه يخلص 3 ونص .. ورن تلفون احمد والمتصل كان راشد .. شل سلامي وحطها على ريوله .. وقعد ع الكرسي ..
احمد: حيالله بو سنيده حيالله القاطع اللي مايفتكر فينا الا فالسنه حسنه ..
راشد وهو مهموم وصوته متغير : مرحبا بو سلامي شحالك ؟؟
احمد: شو بلاك ياريال شو بلاه صوتك ؟؟..
راشد: والله شو اقولك ..
حط احمد سلامي ع الارض وعطاها لعبتها ..
احمد: رب ماشر لاتروعني فيكم شي حد فيكم ياه شي .. ارمس ياريال لاتخليني جذي على اعصابي ..
ودشت شمه وهيه تسمع هالرمسه تمت متروعه ووقفت جدام احمد تبا اتعرف شو السالفه ..
راشد: خالد يااحمد خالد سوا حادث ومحتاجين انسفره برع بااقرب وقت .. لا تخاف الحمد لله هو بخير بس شي واحد خسره ..
احمد منصدم خالد .. خالد مستحيل .. هاذا توأم روح احمد شو استوابه وهو امس مرمسنه : شووووووو اتقووووووووووول انته شوووووووو ياااااااه ؟؟؟...
راشد: احمد استهدا بالله .. قول لااله الا الله .. قدره من الله مانروم نعترض عليه هو بخير وصحه وسلامه بس الدكتور يقول انه ريل وحده من ريوله خلاص مامنها فايده ..
احمد منصدم وواصل حده وايحس انه عيونه تحرقه : ياراشد امززززح غير هالمزحه دخيل الله .. شووو اتقول انته ليش وشو صار وكيف ..؟؟؟
وتم راشد يشرح حق احمد كل السالفه .. ويلس يحايله انه يستهدي بالله ..
احمد وعيونه مليانه دموع وفقلبه قهر : لا اله الا الله .. ياريال هاذا الصقر .. كيف جي يستويبه كيف .. لاحول ولاقوة الا بالله العلي العظيم .. متى بتيبونه ..؟؟؟
راشد: اليوم بنرسل تقريره . وانته وده المستشفى ..
احمد: راشد على اقرب طياره خالد يوصلني وباقرب وقت خلاص كل شي جاهز اعتبر كل شي من الحينه جاهز .. هاتوا دخيل الله ..
راشد: ماعليه يااحمد ان شاء لله .. والله يشافيه ويصبر قلبه ونحصله علاج ..
احمد: ان شاء الله يارب يارب طمنوني دخيلك طمني اول مايوعى من البنج ..
راشد: ان شاء الله ان شاء الله .. يله مع السلامه .. طلبتك حمد لا تكدر بعمرك .. مابيدنا شي غير ندعيله ..
احمد: الله يشفيه ان شاء الله .. مع السلامه .. وسكر احمد عن راشد وهو ضايق معقوله ياخالد معقوله ..
شمه : خير احمد شو مستوي ..
احمد بحزن : خالد..
شمه : خير شو فيه ؟؟
احمد: سوا حادث اليوم الصبح وريله ماعاد منها فايده ايقولون انه هو بخير بس انا مابرتاح لين اشوفه جدامي .. وتم احمد ساكت ومويم وعيونه يتحارقن ..
شمه حطت ايدها على جتفه وتمت تمسح على جتفه : ان شاء الله بااذن الله انه بيغدي بخير .. لا حول ولاقوة الا بالله . الله بيشفيه ان شاء الله . وبيرد احسن عن قبل .. وتم احمد قاعد مكان وسرحان معقوله خالد جذي يستويبه .. ليش ليش ... استغفر الله اللهم لا ااعتراض .. يارب خفف علينا وعليه يارب صبرنا وصبر قلبه ..
احمد نش من مكانه : برايج انا بروح المستشفى بخبرهم وبروح السفاره ..
شمه : ماعليه ياغناتي اتحمل على عمرك .. ربي يحفظك ..
احمد: ان شاء الله ..
وظهر احمد وهو ضايق وشال هم الدنيا بكبرها ع راسه ..
سيارة طحنون
الجمعه 6 المغرب
بوظـــــــــــبي ...
على باب الغلا بكتب وصوفج ... عشان الكل ياعــــــــمري يشوفج
ابي كل البـــشر تعرف غلاتج ... ابي يدورون عن صادق وصوفج
اليازيه وطحنون كانوا توهم رادين من شهر العسل وكل واحد منهم شال في قلبه احلا ذكريات واحلا حب عاشوا مع بعض لحظه بلحظه ..
اليازيه حطت ايدها على ايد طحنون : صدقني اول مره فحياتي استانس على سفره جذي ..
طحنون : فديت قلبج ياروحي اوعدج اني ماازعلج في يوم وكل يوم ايكون احلا عن اليوم اللي قبله ..
اليازيه : ربي يخليك اليه ياربي .. والله لايغير علينا ان شاء الله .
طحنون : امين ياربي .. عيوني ..
اليازيه : لبيه ياروحي ..
طحنون : لباج قلبيه ولبتج روحي .. ولباج طحنون بكبره من ساسه لين راسه ..
اليازيه : ههههههههههه .. مانروم نحن على هالغزل الفصيح ..
طحنون : فصيح بس ..
اليازيه : ههههههه فصيح وجريء ..
طحنون : حلاته انزين ..
اليازيه : ياويل حالي .. الحينه قوم امايه صدق بيصفعوني اذا دروا انيه ييت ولاخبرتهم ..
طحنون : تلقين امايه وصلتلهم الخبر ..
اليازيه : ههههههههه .. لا حليلها توك مخبرنها مسرع ..
طحنون : اممايه لا تتخبرين اسرع عن رويتر ..
اليازه : حرام عليك كله ولا عمتيه لا تخليني اجلب عليك ...
طحنون : واهون عليج اعيش جي بدون جو رومانسي وبدون حب وحنون ..
اليازيه : تراك طماع ..
طحنون : تراج بخيله ..
اليازيه : ماعليه لا تكلمني ربع ساعه .. ها جوب جوب .. وشلت صبعها الصغير ودقتبه .. ع صبع طحنون الصغير اخر صبع ..
طحنون يشل ايده : هههههههههههه لا لا هب كيفج .. لا انا بتصالح .. خلينا نتصالح يزوي يزوي ..
اليازيه : هههههههههههههههه مال اول احس عمري ياهل ..
طحنون : ياهل الا انتي .. بس نونوتي انا بس ..
اليازيه : ياويل حالي .. سوق وطالع دربك يوم بنوصل البيت بنتفاهم ..
طحنون : يصير خير .. بتفاهم معاج تفاهم .. براويج عقب اتريي علي شوي ان ماربطتج اليوم .. هههه .. وتم يضحك عليها .. يستانس يوم يغايضها لانها بسرعه تصدق .. وشوي رن تلفون اليازيه مع انها توها فتحته ..
اليازيه : غريبه تلفوني ايرن ..ووخت تحت وشلت شنطتها وظهرت تلفونها .. ويييه حصوه فديتها ..هلا والله هلا وغلاااااااااااااا فديت اللي يحسون فيني ياربي .. ادري اتولهتي عليه وايد وايد وايد ..
حصه وهي تصيح وميته من الصياح : لحقي يزوووووووي لحقي عليه خالد ذبحت خالد بيديه اجنيت عليه .. انا السبب فلي هو فيه انا السبب وتمت حصه اتصيح بطريقه هستيريه .. واتروعت اليازيه ..
اليازيه منصدمه : حصوووووووه شو اتقوليييييييييين .. ليش شو صار .. شو استوى خبرييييييييييييني .. مات طحنون من الروع وتم فاج اعيونه يطالعها ... وسكرت حصه ..
طحنون : شو بلاكم .؟؟؟
اليازيه منصدمه ودموعها بدت ترس عينها وهي متروعه : ماعرف ماعرف بلاهم .. مادري خالد مادري منوه مااعرف شو مستوي دخيلك و دنيه الهم ..
طحنون : ان شاء الله ان شاء الله ..
وتمت اليازيه متروعه وكل ساعه تتصل حق حصه بس حصه ماكانت اترد ... عليها .. وسيده اول ماوصلت نزلت البيت وهي تربع حتى شطتها ماشلتها ..وتم طحنون في السياره استحى ينزل واتصل في محمد وقاله انه هو في المستشفى عند خالد وراح الهم ..